Alan Turing

Alan Mathison Turing (23 de xunu de 1912, Maida Vale (es) – 7 de xunu de 1954, Wilmslow) foi un matemáticu, lóxicu y criptógrafu británicu. Munchos consideren a Turing el pá de la informática moderna. Col test de Turing, fizo una contribución perimportante al discutiniu sobre la consciencia artificial: si será posible dalgún día decir qu'una máquina piensa y tien conocencia. Tamién amosó una formalización del conceutu d'algoritmu y de computación cola Máquina de Turing; cualesquier modelu de computación ye equivalente o bien un subconxuntu de la máquina de Turing. En 1928, con dieciséis años, Turing descubrió los trabayos d'Albert Einstein y non sólo pudo comprendelos sinón qu'arriendes d'ello infirió les crítiques d'Einstein a les Lleis de Newton de la llectura d'un textu nel que nun taben esplícites. Na so edá escolar Turing foi un rapaz nel que l'optimismu y les ambiciones viéronse agrandaos debido, en gran parte, a la so intensa amistá con Christopher Morcom, que morrió siendo xoven, cosa qu'afectaría a Turing fondamente. Demientres la Segunda Guerra Mundial, Turing trabayó en Bletchley Park, el centru onde los británicos rompíen los códigos de los sos enemigos. Forxó delles téuniques pa romper códigos secretos de los alemanes, ente elles una máquina electromecánica p'alcontrar la configuración de la máquina Enigma. Dempués de la guerra, trabayó nel National Physical Laboratory, creando unu de los primeros diseños pa un programa d'ordenador, anque nun se construyó. Nel 1947 foi pa la Universidá de Manchester y trabayó nel Manchester Mark I, un de los primeros ordenadores. Nel 1952 Turing foi condenáu por homosexual, y foi forzáu a siguir terapia hormonal. Morrió en 1954; paez que se suicidó comiendo una mazana con cianuru.